Երկուշաբթի 14 նոյեմբեր 2016-ին, Հայ Մշակոյթի Տան մէջ,Փարիզի Համազգայինի մասնաճիւղը կազմակերպեց Գրիգոր Պըլտեանի «Կրկնագիր Մարդը» գիրքի ներկայացումը:
Մասնաճիւղէն Արփի Շահապեան կարդաց վարչութեան ատենապետուհի՝ Հուրիկ Պաղտասարեանի խօսքը, ան ներկայացուց օրուան բանախօսը Նորվան արք. Զաքարեան, որ բարձր կը գնահատէ Պըլտեանի գրականութիւնը և հրատարակած է վերլուծական երկու ուսումնասիրութիւն անոր գործերուն:
Ապա խօսք առաւ Նորվան Արքեպիսկոպոս, ներկայացնելով գիրքին տիպարները:
Հեղինակը կը պատմէ կորսուած աշխարհի և նոր միջավայրի ապրումները, թէ ի՛նչպէս անցեալն ու ներկան կը խառնուին ստեղծելով նոր հարցադրումներ:
Բանախօսը մեկնաբանեց պատումին թաքուն ծալքերը, որոնք մեր առջև կը դնեն հիմնական հարցեր՝ օտարութեան և ինքնութեան հարց, լեզուի գոյութենական հարց, որ կը տանի գրողը մինչև գրերու գիւտը:
Իր խօսքը աւելի յստակ դարձնելու համար Նորվան Արքեպիսկոպոս կարդաց գիրքէն քանի մը հատուածներ, մեզ տանելով հեղինակի հոգեմտաւոր աշխարհը եւ յայտնաբերելով անոր տպաւորիչ ոճը :
Ապա խօսքը տրուեցաւ ներկաներուն, որոնք մեծ խանդավարութեամբ արտայայտեցին իրենց տպաւորութիւները և զրուցեցին Գրիգոր Պըլտեանի հետ։