Այսուհետ «Գրանիշ» գրական հանդէսը լոյս կը տեսնի Համազգային հայ կրթական եւ մշակութային միութեան հետ գործակցութեամբ: Այս մասին «Ակումբ» սրահում տեղի ունեցող հանդէսի հերթական համարի շնորհանդէսին ազդարարեցին «Գրանիշ» ակումբի հիմնադիր Կարէն Անթաշեանը եւ «Համազգային» մշակութային հիմնադրամի նախագահ Լիլիթ Գալստեանը:
Շնորհադէսին ներկայ հայրենի մտաւորականներին, լրագրողներին եւ պարզապէս գրասէր քաղաքացիներին ներկայացուեց Գրանիշ-Համազգային գործակցութեան յուշագիրը:
Խօսելով Գրանիշ-Համազգային նոր գործակցութեան մասին` Լիլիթ Գալստեանը նշեց, որ «Գրանիշ» հանդէսի հետ Համազգայինի գործընկերութիւնը ծառայելու եւ նպատակաուղղուելու է ժամանակակից ստեղծագործողների եւ լաւագոյն գրականութեան ճանաչելիութեանն ու տարածմանը, հոգեւոր-մշակութային արժէքների ամրագրման մէջ գրականութեան անփոխարինելի դերի վերահաստատմանը, ինչպէս նաեւ Հայաստանի եւ Սփիւռքի գրական դաշտերի մերձեցմանն ու փոխլրացմանը: Համոզում յայտնուեց նաեւ, որ «Գրանիշ» հանդէսը իրապէս կը դառնայ գեղարուեստական ճաշակի, չափանիշների, քաղաքացիական արժէքների ներկայացման իրական հարթակ
Հանդէսը թեմատիկ է եւ ամփոփում է մէկ գեղարուեստական կամ հասարակական խնդիր: Այս համարը կոչւում է «Գրանիշ քաղաքացի», ուր տեղ են գտել ինչպէս հայ ժամանակակից հեղինակների, այնպէս էլ արտասահմանեան գրականութեան թարգմանութիւններ:
Գրանիշ հանդէսի խմբագրակազմի անդամ Կարէն Անթաշեանն էլ, ողջունելով ներկաներին, անդրադարձաւ, թէ ինչո՛վ է պայմանաւորուած այս համարում քաղաքացու, քաղաքացիական հասարակութեան կարեւորումը. «Գրողի քաղաքացիական դիրքորոշման թեմային անդրադառնալու` «Գրանիշի» այս ձեռնարկը պայմանաւորուած է ձեւակերպումներ ու վերաձեւակերպումներ անելու` հանրային իրական պահանջարկով: Այս թողարկման շրջանակներում փորձ է կատարուել համակողմանի սահմանել մի կողմից գրողներին՝ իրենց հանրային վարքի եւ դիրքաւորման մոդելի ընտրութեան ազատութեամբ, եւ միւս կողմից՝ հասարակութիւնը` իբրեւ կարճաժամկէտ եւ երկարաժամկէտ հեռանկարներում արտիստի հետ փոխյարաբերութեան պահանջատիրական կամ սպառողական, արժեւորող կամ ոչնչացնող մոդելների թելադրող»:
Գրանիշ-Համազգային գործակցութեանը անդրադարձան նաեւ հանդէսի խմբագրակազմի անդամներ Արքմենիկ Նիկողոսեանն ու Յասմիկ Յակոբեանը` իրենց խօսքում յոյս յայտնելով, որ այդ համագործակցութիւնը ապագայում կը ներառի նաեւ փոխադարձ հետաքրքրութիւն եւ կարեւորութիւն ներկայացնող հոգեւոր-մշակութային այլ ոլորտներ:
Նարէ Միքայէլեան
05 Յունիս, 2014
