Ուրբաթ, 21 Յունուարին, «Համազգային» Հայ Կրթական եւ Մշակութային Միութեան Երեւանի գրասենեակում տեղի ունեցաւ սփիւռքահայ անուանի գրող Մովսէս Պչաքճեանի «Ես եւ դուն» բանաստեղծութիւնների ժողովածուի եւ խտասալիկի շնորհանդէսը: Դրանցում ներառուած են 12 բանաստեղծութիւններ, խտասալիկում` Կամօ Տէր-Պետրոսեանի ընթերցանութեամբ:
Բացման ու ողջոյնի խօսքով հանդէս եկաւ «Համազգային» Հայ Կրթական եւ Մշակութային Հիմնադրամի նախագահ, ԱԺ պատգամաւոր Լիլիթ Գալստեանը: Նա նշեց, որ այսպիսի նախաձեռնութիւններով «Համազգայինը» իր համեստ ներդրումն է փորձում բերել Հայաստան-Սփիւռք գրական կապերի ամրապնդմանը: Լիլիթ Գալստեանը յատուկ շնորհակալութիւն յայտնեց բոլոր նրանց, ովքեր աշխատել են այդ գրքի վրայ, ու նաեւ նրանց, ովքեր աջակցել են հրատարակութեանը՝ չցանկանալով, որ որեւէ կերպ յիշատակուի իրենց անունը:
Այնուհետեւ ելոյթ ունեցան ՀԳՄ նախագահ Լեւոն Անանեանը, գրող Մերուժան Տէր-Գուլանեանը, Էլիզ Շարաբխանեանը, գրականագէտ Մարգարիտ Խաչատրեանը: Նրանք շատ բարձր գնահատեցին Պչաքճեանի գրականութիւնը, համարելով, որ նրա վէպերի ու նոյնիսկ լրագրական յօդուածների շնորհիւ հայուն գոյութիւնը Սփիւռքում աւելի հաստատուն հողի վրայ է դրուած:
Ասմունքող Սիլվա Իւզպաշեանը կարդաց Պչաքճեանի մի քանի բանաստեղծութիւններ:
Վերջում կարճ շնորհակալական խօսք ասաց Մովսէս Պչաքճեանը:
Շնորհանդէսին ներկայ էին անուանի գրողներ, մտաւորականներ` Վրէժ Իսրայէլեանը, Դաւիթ Սարգսեանը, Մերուժան Տէր Գուլանեանը,Հրաչեայ Սարիբեկեանը, Վահագն Սարգսեանը, Արքմենիկ Նիկողոսեանը, Լեւոն Բլբուլեանը եւ ուրիշներ։