Օրհնութեամբ Լիբանանի հայոց առաջնորդ Նարեկ արքեպիսկոպոսին, հովանաւորութեամբ Համազգայինի Լիբանանի Շրջանային վարչութեան, Երեքշաբթի, 7 Յունուար 2020-ին, երեկոյեան ժամը 8:00-ին, Նորաշէնի Սրբոց Վարդանանց եկեղեցւոյ մէջ Ս. Ծննդեան տօնին առիթով ելոյթ ունեցաւ Համազգայինի «Գուսան» երգչախումբը` խմբավարութեամբ Գրիգոր Ալոզեանի, երգեհոնի ընկերակցութեամբ Յասմիկ Գասպարեանի:
Օրուան հանդիսավար Քրիստ Իսկենտէրեան շնորհաւորեց ներկաները Ս. Ծննդեան տօնին առիթով, ապա հայերէնով եւ անգլերէնով մերթ ընդ մերթ ներկայացուց երգերը: Համերգը կ՛ընդգրկէր աւանդական շարականներ, Կոմիտասի ծննդեան շարականներէն, ծննդեան երգեր, աւետիսներ, ինչպէս` «Խորհուրդ մեծ եւ սքանչելի», «Այսօր տօն է Ս. ծննդեան», «Գիշերն իջաւ մեղմիկ լուռ», «Լուռ գիշեր», «Ծափ զարկ աշխարհ», եւ այլն, որոնք մեկնաբանուեցան հայերէնով, արաբերէնով, անգլերէնով եւ ասորերէնով: Համերգի մենակատարներն էին սոփրանօ Շողիկ Թորոսեան եւ Աւետիս Ագրապեան: Համերգին իրենց մասնակցութիւնը բերին Նաթալի Աբոքեան` տուտուկ եւ Ռիթա Աստիկեան` ջութակ:
Համերգի աւարտին տեղի ունեցաւ Նոր տարուան առաջին Անդաստանի կարգը հանդիսապետութեամբ Լիբանանի հայոց թեմի քարոզիչ Անանիա ծ. վրդ. Գուճանեանի:
Համերգի եզրափակիչ բաժինով Անանիա ծ. վրդ. Գուճանեան ուղղեց իր սրտի խօսքը: