Համազգային հայ կրթական եւ մշակութային միութեան Արցախի գրասենեակի պատասխանատու Հերմինէ Աւագեանը 18 Սեպտեմբերից Հոկտեմբերի 2-ն աշխատանքային այցով գտնւում էր ԱՄՆ արեւելեան շրջանում։ Այցի նպատակն էր` արցախցի լուսանկարիչ Դաւիթ Ղահրամանեանի լուսանկարների ցուցադրութիւնը, որին ներկայ էր նաեւ վաւերագրող-լուսանկարիչը։
Ցուցադրութիւններն ընդգրկում էին Արցախի 44-օրեայ պատերազմի, շրջափակման ու տեղահանութեան լուսանկարները` ցոյց տալով ու փաստելով այն իրականութիւնը, որ Արցախում տեղի ունեցածը ոչ այլ ինչ է, եթէ ոչ ցեղասպանութիւն։
Այցը կազմակերպուել էր ԱՄՆ Հայ Դատի կենտրոնական գրասենեակի հրաւէրով` ԱՄՆ Արեւելեան Ամերիկայի ՀՅԴ կառոյցի նախաձեռնութեամբ։
Լուսանկարների ցուցադրութիւններ տեղի ունեցան ԱՄՆ Կոնգրեսում, Ֆիլադելֆիայում, Չիկագոյում, Բոստոնում եւ Նիւ Եորքում։
Ցուցադրութիւնների վերջում Հ.Աւագեանը ներկայացնում էր նաեւ Համազգայինի հրատարակութիւնները` «Անաւարտ պատերազմ» եռալեզու պատկերագիրք, «Soaring words» վերնագրով արցախցի 8 հեղինակների արձակ գործերի անգլերէն ժողովածու, «Արցախ։ Վտանգուած ժառանգութիւն» եռալեզու պատկերագիրք։
Այս ամէնի կողքին առանձին ներկայացուած էին նաեւ Համազգայինի Արցախի գրասենեակի արուեստի խմբակներին մասնակից երեխաների ձեռքի աշխատանքները։
Նշեալ միջոցառումների կազմակերպմանն իրենց պատրաստակամ մասնակցութիւնը ցուցաբերեցին Համազգայինի Արեւելեան շրջանի մի շարք կառոյցներ` Ֆիլադելֆիայի, Չիկագոյի, Բոստոնի, Նիւ Ջերսիի եւ Նիւ Եորքի։
Բոլոր քաղաքներում միջոցառումներին ներկայ էին նաեւ ՀՕՄ քոյր կառոյցի ներկայացուցիչներ։
Նիւ Եորքում տեղի ունեցած միջոցառման կայացմանն իր մեծ դերն ունեցաւ Սուրբ Գրիգոր Լուսաւորիչ եկեղեցու հոգեւոր հովիւ Մեսրոպ քահանայ Լագիսեանը։
Համազգայինի Արցախի գրասենեակն իր երախտագիտութիւնն է յայտնում ԱՄՆ Հայ Դատի կենտրոնական գրասենեակին` այս պատասխանատու եւ կարեւոր նախաձեռնութեան համար եւ մաղթում անսպառ եռանդ` նորանոր դժուար, բայց նուիրական ծրագրերի իրականացման ճանապարհին։
