Համազգայինի Արեւմտեան Շրջանի Շրջանային Վարչութիւնը Նոր Տարուան եւ Սուրբ Ծնունդի առիթով երախտագիտութեան երեկոյ մը կազմակերպեց Շաբաթ, 4 Յունուար 2025-ին, Համազգայինի Արիս Սթամպոլեան Մշակութային Կեդրոնին մէջ՝ մեծարելու այն նուիրատուները, որոնց առատաձեռն նուիրատուութիւնները կարելի դարձուցին սեփական կեդրոնի ձեռքբերումը:
Ձեռնարկին ներկայ գտնուեցան կեդրոնի բարերարը՝ տէր եւ տիկին Արիս եւ Անժէլլա Սթամպոլեան, տիար Ալեքս Անտէքեան, ինչպէս նաեւ նուիրատուներ: Տէր եւ տիկին Ալպէր եւ Թերի Պէզճեանները ներկայ չէին, սակայն անոնց զգալի ներդրումները ջերմօրէն յիշուեցան:
Շրջանային Վարչութեան ատենապետ Մանուկ Չուխաճեան ողջունեց հիւրերը եւ խօսեցաւ կազմակերպութեան ապագայ ծրագիրներուն մասին: Արեւմտեան Միացեալ Նահանգներու Թեմիս բարեջան Առաջնորդ Գեղամ Արք. Խաչերեան իր սրտանց շնորհաւորութիւնը յայտնեց Համազգայինի Արեւմտեան Շրջանին՝ այս մեծ ձեռքբերումին համար: Առաջնորդը ընդգծեց Համազգայինի կենսական դերը հայկական ժառանգութեան եւ մշակոյթի պահպանման մէջ՝ շեշտելով այս նոր կեդրոնի կարեւորութիւնը այդ առաքելութիւնը շարունակելու համար:
Այնուհետեւ հիւրերը շրջեցին կեդրոնին մէջ եւ ծանօթացան բաժանմունքներուն եւ ապագայ նորոգութիւններու ծրագիրներուն: Ջերմ եւ ընտանեկան մթնոլորտին մէջ շատեր իրենց շնորհաւորանքները յայտնեցին Շրջանային Վարչութեան՝ այս տեսիլքը իրականութիւն դարձնելու համար:
Համազգայինի Արեւմտեան Շրջանը իր խորին երախտագիտութիւնը կը յայտնէ բոլոր նուիրատուներուն, իրենց անվերապահ աջակցութեան համար՝ այս մշակութային կեդրոնի ձեռքբերումը իրագործելու համար: Այս ամուր հիմքով, Շրջանային Վարչութիւնը յանձնառու է նոր նախաձեռնութիւններու մեկնարկման՝ ուղղուած հայ համայնքի հարստացման եւ մշակութային ժառանգութեան պահպանման: Շուտով նախատեսուած է նաեւ հանդիսաւոր Բացման ձեռնարկ մը՝ հանրութիւնը ողջունելու նպատակով:
