27 Սեպտեմբեր, 2021-ին, Համազգային հայ կրթական եւ մշակութային միութեան Արցախի գրասենեակի նախաձեռնութեամբ Ստեփանակերտի պատկերասրահում բացուել է արցախցի լուսանկարիչ Դաւիթ Ղահրամանեանի «Պատերազմի աչքերը» խորագրով լուսանկարների ցուցադրութիւնը։
Ներկայացուել է շուրջ 100 լուսանկար` 44-օրեայ պատերազմից։ Լուսանկարները ներկայացնում են պատերազմի ընթացքը մարտադաշտից մինչեւ թիկունք` ժամկէտային զինծառայողներ ու կամաւորներ, կեանքը` ռմբապաստարաններում, աւերուած շինութիւններ: Ուշագրաւ են Շուշիից, Քարինտակից ու առաջնագծի լուսանկարները: Դաւիթ Ղահրամանեանը մարտնչող զինուորների կամաւորների դիմանկարային լուսանկարներով ներկայացրել է նրանց ոգեշունչ ու մարտական բարձր տրամադրութիւնը: Ցուցադրութեան են ներկայացուել նաեւ Արցախի փրկարար ծառայողների նուիրական գործունէութեանը նուիրուած լուսանկարներ: Ինչպէս Արցախի Հանրապետութեան ԿԳՄՍ Լուսինէ Ղարախանեանն է նկատում, լուսանկարներում պատկերուած է այդ օրերի հերոսական ու աննկուն ոգին, ինչը հեղինակին` Դաւիթ Ղահրամանեանին է բնորոշում նաեւ:
